काठमाडौं / कोरोना भाइरस (कोभिड १९) को संक्रमणका कारण मृत्यु हुनेको संख्या ८ पुगेको छ ।
बाजुराको आइसोलेसनमा बसेकी एक बालिकाको मृत्यु भए संगै नेपालमा कोरोनाबाट मृत्यु हुनेको संख्या ८ पुगेको हो ।
मृत्यु भएकी ती बालिकाको स्वाब परीक्षण गर्दा कोरोना पोजेटिभ देखिएको छ ।
बाजुराको जिल्ला अस्पतालमा रहेको आइसोलेसनमा रहेकी दुई वर्षीया बालिकाको गएराती मृत्यु भएको थियो । अभिभावकसँग भारतबाट आएकी उनको गएराती मृत्यु भएको अस्पतालका प्रमुख डा.रुपचन्द्र बिकले जानकारी दिए ।
गाउँको क्वारेन्टाइनमा रहेकी उनलाई स्वास्थ्यमा समस्या भएपछि जिल्ला अस्पतालको आइसोलेसनमा राखिएको थियो । उनलाई ज्वरो आउने र बान्ता हुने समस्या थियो ।
अस्पतालले बालिकासँगै उनको आफन्तको पनि स्वाब परीक्षणका लागि पठाइएको थियो । उनकी आमामा पनि कोरोना भाइरस संक्रमण पाइएको छ ।
