एजेन्सी । मैत्रीपूर्ण खेलमा इजरायलमाथि पोर्चुगलले फराकिलो जित निकालेको छ ।
बुधबार राति भएको खेलमा पोर्चुगलले इजरायललाई ४–० गोल अन्तरले पराजित गर्दै फराकिलो जित निकालेको हो ।
पोर्चुगलको जितमा ब्रुनो फर्नान्डेसले दुई गोल गरे भने क्रिस्टियानो रोनाल्डो र जोआ कान्सेलोले एक एक गोल गरे ।
खेलको ४२ औं मिनेटमा फर्नान्डेसले गोल गर्दै पोर्चुगललाई सुरुवाती अग्रता दिलाएका थिए । यस्तै खेलको ४४ औं मिनेटमा कप्तान रोनाल्डोले गोल गर्दै टिमको अग्रता २–० को बनाए ।
त्यसपछि खेलको ८६ औं मिनेटमा जोआले गोल गर्दा पोर्चुगल ३–० ले अघि रह्यो । खेलको इन्जुरी समयमा फर्नान्डेसले व्यक्तिगत दोस्रो गोल गर्दै पोर्चुगललाई ४–० को जित दिलाए ।
साविक विजेता समेत रहेको पोर्चुगल यस पटक कठिन समूहमा रहेको छ । पोर्चुगल रहेको समूह ‘एफ’ मा विश्वकप विजेता फ्रान्स, जर्मनी र हंगेरी रहेको छ ।
