एजेन्सी । कोपा अमेरिका फुटबलमा आयोजक ब्राजिलले सानदार जित निकालेको छ ।
ओलम्पिक निल्टन सान्तोस स्टेडियममा शुक्रबार बिहान भएको खेलमा पेरुलाई ४–० गोल अन्तरले पराजित गर्दै ब्राजिलले लगातार दोस्रो जित निकालेको हो ।
ब्राजिललाई जित दिलाउन एलेक्स सान्ड्रो, नेयमार, एभर्टन रिबेरो र रिचार्लीसनले एक एक गोल गरे ।
खेलको १२ औं मिनेटमा ग्राबियल जिससको पासमा एलेक्सले गोल गर्दै ब्राजिललाई सुरुवाती अग्रता दिलाएका थिए ।
यसैगरि खेलको ६८ औं मिनेटमा फ्रेडको पासमा नेयमारले गोल गर्दै ब्राजिललाई २–० को अग्रता दिलाए । ब्राजिलका लागि नेयमारको यो ६८ औं गोल हो ।
खेलको ८९ औं मिनेटमा रिचार्लीसनको पासलाई सदुपयोग गर्दै एभर्टनले गोल गर्दा ब्राजिलले ३–० को अग्रता बनायो ।
त्यसपछि खेलको इन्जुरी समयमा रिचार्लीसनले गोल गर्दै ब्राजिललाई ४–० को सानदार जित दिलाए ।
यस जितसँगै समूह ‘बी’ मा रहेका ब्राजिलले २ खेलमा ६ अंक जोडेको छ । ब्राजिल समूहको शीर्ष स्थानमा रहेको छ । पहिलो खेल खेलेको पेरुको यो पहिलो हार हो । पेरु समूहको पुछारमा रहेको छ ।
यसै समूहको अर्को खेलमा कोलम्बिया र भेनेजुएलाले गोलरहित बराबरी खेल्दै अंक बाडेका छन् ।
कोलम्बिया २ खेलमा ४ अंक जोडेर समूहको दोस्रो स्थानमा रहेको छ । एक अंक जोडेको भेनेजुएला तेस्रो स्थानमा रहेको छ ।