काठमाडौं । नेपालले स्कटल्याण्डमा जारी त्रिकोणात्मक एकदिवसीय अन्तराष्ट्रिय सिरिजमा पहिलो जित हासिल गरेको छ ।
नेपालले आईसीसी पुरुष विश्वकप लिग टू अन्तर्गत बुधबार भएको खेलमा आयोजक स्कटल्याण्डलाई ५ विकेटले हराउँदै सिरिजमा पहिलो जित हासिल गरेको हो ।
स्कटल्याण्डविरुद्ध नेपालको यो पहिलो ऐतिहासिक जित हो ।
स्कटल्याण्डले दिएको १ सय ४५ रनको लक्ष्य नेपालले २५ ओभर १ बलमा ५ विकेट गुमाएर पूरा गर्यो ।
नेपालको जितमा आसिफ शेखले ६२ बलमा १० चौका र १ छक्का प्रहार गर्दै ७१ रनको अर्धशतकीय इनिङ खेले ।
यस्तै कुशल भुर्तेलले २७ रन जोड्दा देव खनाल ४, दिपेन्द्र सिंह ऐरी ३ र आरिफ शेख १ रनमा आउट हुदा रोहित पौडेल ३४ रनमा अविजित रहे भने आदील आलम सुन्य रनमा अविजित रहे ।
स्कटल्याण्डका गाभिन मेनले ३ तथा एड्रिन निल र रिची बेरिङटनले १/१ विकेट लिए ।
यसअघि टस हारेर पहिले ब्याटिङ गरेको स्कटल्याण्डले ४२ ओभर ५ बलमा अलआउट हुँदै १ सय ४४ रन बनाएको थियो ।
स्कटल्याण्डका लागि गाभिन मेनले अविजित रहदै सर्वाधिक ६४ रनको अर्धशतकीय इनिङ खेले । मार्क वाटले १७ तथा सफ्यान शारिफले १६ रन जोड्दाकलुम म्याकलोडले १३ रन जोडे भने अन्य खेलाडीले दोहोरो अंक जोड्न सकेनन् ।
नेपालका सोमपाल कामी र आदील आलमले ३/३ विकेट लिए । यस्तै कप्तान सन्दीप लामिछानेले २ तथा करण केसी र दिपेन्द्र सिंह ऐरीले १/१ विकेट लिए ।
यस जितसँगै नेपालले १८ खेलमा १७ अंक जोड्दै लिग टू को अंक तालिकाको पाँचौं स्थानमा उक्लिएको छ । स्कटल्याण्ड २२ खेलमा ३० अंक जोडेर दोस्रो स्थानमा रहेको छ ।
सिरिज अन्तर्गत अब नेपालले तेस्रो खेलमा नामिबियाविरुद्ध शनिबार र अन्तिम खेलमा नेपालले स्कटल्याण्डविरुद्ध अर्को आइतबार खेल्नेछ ।
यस अघि भएको पहिलो खेलमा नेपाल नामिबियासँग ४० रनले पराजित भएको थियो । स्कटल्याण्डको यो जारी सिरिजमा पहिलो हार हो । पहिलो खेलमा स्कटल्याण्डले नामिबियालाई ७७ रनले हराएको थियो ।
