भदौ २२, दमक । भारत युएईमा जारी एसिया कप क्रिकेट अन्तर्गत सुपर चारको खेलमा श्रीलंसँग पराजित भएको छ ।
मंगलबार राति दुबईमा भएको खेलमा श्रीलंकासँग भारत ६ विकेटले पराजित भएको हो ।
भारतले दिएको १ सय ७४ रनको लक्ष्य श्रीलंकाले १ बल बाँकी रहदा ४ विकेट गुमाएर पूरा गर्यो ।
उसका लागि कुशल मेन्डिस र पथुम निशंकाले अर्धशतक बनाए । मेन्डिसले ५७ तथा निशंकाले ५२ रन बनाए । यस्तै कप्तान दसुन शनकाले ३३ तथा भानुका राजपाक्षले २५ रन बनाए ।
भारतका लागि युजभेन्द्र चाहलले ३ तथा रविचन्द्रन आश्विनले १ विकेट लिए।
यसअघि पहिले ब्याटिङ गरेको भारतले २० ओभरमा ८ विकेट गुमाएर १ सय ७३ रन बनाएको थियो ।
भारतका लागि कप्तान रोहित शर्माले ७२ रनको अर्धशतकीय ईनिङ खेले । ४१ बलमा ४ छक्का र ५ चौकाको मद्दतमा उनले ७२ रन बनाए ।
सुर्यकुमार यादवले २९ बलमा ३४ रन तथा हार्दिक पाण्ड्या र ऋषभ पन्तले १७÷१७ रन बनाए ।
श्रीलंकाको जितमा दिलशान मधुशंकाले ३ तथा चामिका करुनारत्ने र दासुन शनकाले समान २÷२ विकेट लिए ।
सुपर चारमा श्रीलंकाको यो लगातार दोस्रो जित हो । भारतको भने लगातार दोस्रो हार हो ।
बुधबार हुने पाकिस्तान र अफगानिस्तानबीचको खेलमा पाकिस्तान विजयी भएमा भारतको फाईनल पुग्ने सम्भावना समाप्त हुनेछ ।
