मंसिर १६, माङसेबुङ । कतारमा जारी फिफा विश्वकप फुटबलमा जापान नकआउट चरणमा प्रवेश गरेको छ ।
बिहीबार राति खालिफा अन्तराष्ट्रिय स्टेडियममा स्पेनलाई २–१ गोल अन्तरले हराउँदै जापानले अन्तिम १६ मा स्थान पक्का बनाएको हो ।
जापानको जितमा रित्सु डोन र एओ टानकाले एक एक गोल गरे । यता स्पेनका अल्भारो मोराटाले एक गोल फर्काए ।
खेलको ११ औं मिनेटमा मोराटाले गोल गर्दै स्पेनलाई सुरुवाती अग्रता दिलाएका थिए ।
तर, दोस्रो हाफमा जापानले उत्कृष्ट पुनरागमन गर्दै खेलको ४८ औं मिनेटमा रित्सुले गोल गर्दै जापानलाई १–१ को बराबरीमा ल्याए । त्यसपछि खेलको ५१ औं मिनेटमा टानकाले गोल गर्दै जापानलाई २–१ को जित दिलाए ।
जितसँगै जापान समूह ‘ई’ को समूह विजेता बन्दै नकआउट चरणमा पुगेको हो । पराजित स्पेन पनि समूह उपविजेता बन्दै नकआउट चरणमा प्रवेश गरेको छ ।
यता जर्मनी भने जारि विश्वकपमा समूह चरणबाटै बाहिरिएको छ ।
समूह चरणको अन्तिम खेलमा कोष्टारिका माथि ४–२ गोल अन्तरले जित निकालेपनि अन्तिम १६ मा स्थान बनाउन सकेन ।
