असार १८, काठमाडौं । नेपाल मलेसियामा जारी एसीसी मेन्स यू-१६ ईस्ट जोन कपको फाइनलमा प्रवेश गरेको छ ।
सोमबार मलेसियाको बायोमास ओभल क्रिकेट मैदानमा भएको खेलमा सिंगापुरलाई ९८ रनले पराजित गर्दै नेपाल फाइनलमा प्रवेश गरेको हो ।
नेपालले दिएको १ सय ८५ रनको लक्ष्य पछ्याएको सिंगापुर ३१ दशमलब ३ ओभरमा ८७ रन बनाउँदै अलआउट भयो ।
सिंगापुरका लागि ओपनर रोशन रविचन्द्रनले सर्वाधिक २४ रन बनाए । यस्तै कबिरले ११ रन बनाए ।
सिंगापुरका अन्य ९ ब्याटरले दोहोरो अंकमा रन जोड्न सकेनन् ।
नेपालका लागि कृतिक कामतले ३ तथा सन्तोष यादव, अभिषेक तिवारी, नरेन भट्ट, प्रतिक पोखरेल र अशोक धामीले समान १/१ विकेट लिए ।
यसअघि टस जितेर पहिला ब्याटिङ गरेको नेपालले निर्धारित ३५ ओभरमा ९ विकेट गुमाउँदै १ सय ८४ रन बनायो ।
नेपालका ओपनर सुर्यांशु कोईरालाले ४३ रन बनाए । सूर्यांशु हर्ष वेंकटरामको बलमा रियान नैकबाट क्याच आउट हुन पुगे । निरज यादवले ४२ रन बनाए ।
पहिलो विकेट गुमाए पछि भने विकेटकिपर आषिश लुहार ६ रनमै क्याच आउट हुन पुगे । नरेन भट्ट ३ रनमा हरिहरनको बलमा कट एण्ड बोल्ड आउट भए ।
कप्तान अभिषेक तिवारी २५ रनमा आउट भए । मध्यक्रमका ब्याटर सन्तोष यादव १८ तथा प्रतिक भट्टराई १२ रनमा आउट भए । यस्तै दीपु कुमार १२ तथा कृतिक कामत ५ रनमा आउट भए ।
सिंगापुरका हरिहरनले ३ तथा हर्ष वेंकटराम र कबिर समान २/२ विकेट लिए ।
जितसँगै नेपालले मंगलबार हुने फाइनल खेलमा मलेसियासँग उपाधीका लागि खेल्नेछ ।
