भदौ २७, काठमाडौं । एसीसी एसिया कप क्रिकेटमा श्रीलंकालाई हराउदै भारत फाइनलमा प्रवेश गरेको छ ।
मंगलबार श्रीलंकाको आर प्रेमदासा क्रिकेट स्टेडियममा भएको खेलमा श्रीलंकालाई ४१ रनले हराउँदै भारत फाइनल पुगेको हो ।
भारतले दिएको २ सय १४ रनको लक्ष्य पछ्याएको श्रीलंका १ सय ७२ बलमा अलआउट भयो ।
श्रीलंकाका लागि दुनिथ वेललेजले ४६ बलमा अविजित ४२ रन बनाए । धनन्जय डि सिल्भाले ४१ तथा चरिथ असलंकाले २२ रन बनाए ।
भारतका लागि कुलदिप यादवले ४ तथा रविन्द्र जडेजा र जसप्रित बुमराहले समान २÷२ विकेट लिए ।
त्यसअघि टस जितेर पहिले ब्याटिङ गरेको भारतले ४९ दशमलब १ ओभरमा अलआउट हुदै २ सय १३ रन बनाएको थियो ।
भारतका लागि कप्तान समेत रहेका ओपनर रोहित शर्माले ५३ रनको अर्धशतकीय ईनिङ खेले । यस्तै शुभमन गिलले २५ बलमा १९ रन बनाए ।
केएल राहुलले ४४ बलमा ३९ तथा ईशान किशनले ६१ बलमा ३३ रन बनाएका थिए । एक समय १ सय ५३ रनमा ३ विकेट मात्र गुमाएको भारतले ६० रन जोड्दा बाँकी ७ विकेट गुमाएको थियो ।
श्रीलंकाका लागि दुनिथले ५ विकेट लिएका थिए । यस्तै चरिथ असलंकाले ४ विकेट लिएका थिए । महेश थिक्सनाले १ विकेट लिए ।
बिहीबार हुने पाकिस्तान र श्रीलंकाको खेलमा विजेता बन्ने टोली फाइनलमा पुग्ने छ । फाइनल खेल आईतबार हुनेछ ।