असोज २७, काठमाडौं । आईसीसी एकदिवसीय विश्वकप क्रिकेटमा घरेलु टोली भारतले लगातार तेस्रो जित निकालेको छ ।
शनिबार अहमदाबाद स्थित नरेन्द्र मोदी क्रिकेट स्टेडियममा भएको खेलमा पाकिस्तानलाई ७ विकेटले हराउँदै भारतले लगातार तेस्रो जित निकालेको हो ।
पाकिस्तानले दिएको १ सय ९२ रनको सामान्य लक्ष्य भारतले ३० दशमलव ३ ओभरमा मात्र ३ विकेट गुमाएर भेटायो ।
भारतका लागि कप्तान रोहित शर्माले ८६ रनको शानदार अर्धशतकीय इनिङ्स खेले । श्रेयस एयरले अविजित ५३ रन बनाउँदा सुभमन गिल र विराट कोहलीले समान १६ रन बनाए । केएल राहुल भने १९ रनमा अविजित रहे ।
पाकिस्तानका साहिन साह अफ्रिदीले २ तथा हसन अलीले १ विकेट लिए ।
यसअघि, पहिले ब्याटिङ गरेको पाकिस्तान ४२ दशमलव ५ बलमा अलआउट हुदैं १ सय ९१ रनमा समेटियो ।
पाकिस्तानका लागि बाबर आजमले ५० रन बनाउँदा मोहमद रिजवानले ४९ रन बनाएका थिए ।
यस्तै ओपनर इमाम उल हकले ३६ रन बनाउँदा अर्का ओपनर अब्दुल्लाह सफिकले २० रन बनाएका थिए । हसन अलीले १२ रन जोडे । अन्य कुनैपनि खेलाडीले दोहोरो अंक बनाउन सकेनन् ।
भारतका जसप्रीत बुम्राहा, मोहमद सिराज, हार्दिक पाण्डेया, कुलदीप यादव र रबिन्द्र जडेजाले समान दुई दुई विकेट लिएका थिए ।
