कातिक ४, काठमडौं । मलेसियामा जारी एसिसी यु–१९ प्रिमियर कपमा नेपाल फाइनलमा प्रवेश गरेको छ ।
शनिबार बायोमास ओभरमा वर्षाले प्रभावित पहिलो सेमिफाइनल खेलमा जापानलाई डकवर्थ लुइस पद्धतिमा १ सय ४४ रनले हराउँदै नेपाल फाइनलमा प्रवेश गरेको हो । फाइनल प्रवेश गरेसँगै नेपालले एसिसी यु–१९ एसिया कपमा समेत छनोट भएको छ ।
नेपालले दिएको १ सय ८३ रनको लक्ष्य पछ्याएको जापानले ११.३ ओभरमा सबै विकेट गुमाउँदै ४३ रन मात्र बनाउन सक्यो ।
जापानका लागि सान्तारो हिरातसुकाले १५ र केइफर यामामोटो लाकेले १३ रन बनाउनु बाहेक अन्य ब्याटरले दोहोरो अंकमा रन जोड्न सकेनन् ।
नेपालका लागि हेमन्त धामी र दीपेश कँडेलले समान तीन, सुवास भण्डारीले दुई र अकाश भण्डारीले एक विकेट लिए ।
यसअघि टस हारेर ब्याटिङको निम्तो पाएको नेपालले २५ ओभरमा दुई विकेट गुमाउँदै १ सय ४० रन बनाएको अवस्थामा वर्षाका कारण खेल रोकिएको थियो ।
त्यसपछि नेपालको ब्याटिङ सम्भव नभएपछि जापानलाई १ सय ८३ रनको लक्ष्य दिइएको थियो ।
नेपालका लागि दीपक बोहराले सर्वाधिक ७९ रनको योगदान गरे । यसैगरी आकाश त्रिपाठीले अविजित ३५ रन, अर्जुन कुमालले १० रन र कप्तान देव खनालले अविजित ८ रन बनाए ।
जापानका लागि कप्तान काजुमा कातो स्याटफोर्ड र केइफर यामामोटो लाकेले समन एक विकेट लिए ।
नेपाल समूह ‘ए’ तथा जापान समूह ‘डी’ को विजेताका रूपमा सेमिफाइनल प्रवेश गरेका थिए ।
