कातिक १४, काठमाडौं । नेपालले आईसीसी टी–२० विश्वकप क्रिकेट छनोटमा लगातार दोस्रो जित निकालेको छ ।
मंगलबार त्रिवि क्रिकेट मैदानमा भएको खेलमा मलेसियालाई ६ विकेटले हराउँदै लगातार दोस्रो जित निकालेको हो ।
मलेसियाले प्रस्तुत गरेको १ सय ६६ रनको लक्ष्य नेपालले २ ओभर बाँकी छँदै मात्र ४ विकेट गुमाएर पुरा गर्यो ।
नेपालको जितमा कुशल मल्लले ६५ रनको शानदार इनिङ्स खेले । यस्तै ओपनरद्धय कुशल भुर्तेलले ४३ रन र आसिफ शेखले ३२ रन र कप्तान रोहित पौडेल २ रनमा पोविलियन फर्कदा सन्दीप जोरा १८ र विवेक यादव २ रनमा नटआउट रहे ।
मलेसियाका मुहमद आमिरले ३ तथा प्रविनदीप सिंहले एक विकेट हात पारेका थिए ।
यसअघि, पहिले ब्याटिङ गरेको मलेसियाले निर्धारित ओभरमा ९ विकेट गुमाएर १ सय ६५ रन बनाएको थियो ।
ओपनर सैयद अजीजले ६८ रन र जुबैदी जुल्किफले २४ रन बनाउँदै मलेसियालाई शानदार सुरुआत दिलाएका थिए ।
नेपालका अविनाश बोहोराले ४ विकेट लिए । रोहित पौडेल, गुल्सन झा र सन्दीप लामिछानेको नाममा एक एक विकेट रह्यो ।
नेपालले समूह चरणका दुवै खेलमा जित निकाल्दै ४ अंक जोडेको छ । यो जितसँगै नेपाल प्रतियोगिताको सेमिफाइनलमा प्रवेश गरेको छ ।
