कातिक १५, काठमाडौं । दक्षिण अफ्रिकाले भारतमा जारी आइसिसी एकदिवसीय विश्वकप क्रिकेटमा न्युजिल्यान्डमाथि सानदार जित निकालेको छ ।
बुधबार पुनेस्थित महाराष्ट्र क्रिकेट संघको मैदानमा भएको खेलमा न्युजिल्यान्डलाई एक सय ९० रनले हराउँदै सानदार जित निकालेको हो ।
दक्षिण अफ्रिकाले प्रस्तुत गरेको ३ सय ५८ रनको लक्ष्य पछ्याएको न्युजिल्यान्ड ३५.३ ओभरमा १ सय ६७ रनमै अलआउटयो ।
न्युजिल्यान्डका लागि लेन फिलिप्सले सर्वाधिक ६० रनको योगदान गरे । यसैगरी विल योङ्गले ३३ रन र ड्यारिल मिचेलले २४ रन बनाउनु बाहेक अन्य ब्याटरले दोहोरो अंकमा रन जोड्न सकेनन् ।
दक्षिण अफ्रिकाका लागि केशव महाराजले चार, मार्को यानसनले तीन, जेराल्ड कोएट्जीले दुई र कागिसो रबाडाले एक विकेट लिए ।
यसअघि टस हारेर ब्याटिङको निम्तो पाएको दक्षिण अफ्रिकाले निर्धारित ५० ओभरमा चार विकेट गुमाउँदै ३ सय ५७ रनको योगफल तयार पारेको थियो ।
दक्षिण अफ्रिकाका लागि रास्सी भान डेर डुसेनले १ सय १८ बलमा नौ चौका र पाँच छक्काको मद्दतले सर्वाधिक १ सय ३३ रनको योगदान गरे । यस्तै क्विनटन डिककले १ सय १६ बलमा १० चौका र तीन छक्काको मद्दतले १ सय १४ रन बनाए ।
यसैगरी डेविड मिलरले ३० बलमा चार छक्का र दुई चौकाको मद्दतले ५३ र हेन्ड्रिक क्लासेनले अविजित १५ रन जोडे ।
न्युजिल्यान्डका लागि टिम साउथीले दुई तथा ट्रेन्ट बोल्ट र जेम्स निशमले समान एक विकेट लिए ।
जितसँगै दक्षिण अफ्रिका सात खेलमा १२ अंकका साथ शीर्ष स्थानमा उक्लिएको छ । लगातार तेस्रो पराजय व्यहोरेको न्युजिल्यान्ड समान खेलबाट आठ अंकका साथ चौथो स्थानमा झरेको छ ।
