पुस १४, काठमाडौं । नेपाल सुपर लिग (एनएसएल) को दोस्रो संस्करणको उपाधि ललितपुर सिटी एफसीले कव्जा गरेको छ ।
शनिबार भएको फाइनल खेलमा धनगढी एफसीलाई ३–२ गेल अन्तरले पराजित गर्दै ललितपुरले उपाधि कब्जा गरेको हो ।
ललितपुरलाई जित दिलाउन इमो एजिकेलले दुई गोल गरे । त्यस्तै दिनेश हेम्जनले एक गोल गरे । धनगढीका लागि ओलावाले अफिज र अहमेद हिजाजिले एक–एक गोल गरे ।
धनगढीका लागि ओलावाले अफिजले खेलको ३९औं मिनेटमा गोल गर्दै खेलमा सुरुवाती अग्रता दिलाएका थिए ।
पहिलो हाफको इन्जुरी समयमा ललितपुरका लागि इमो एजिकेलले गोल गर्दै ललितपुरलाई बराबरीमा फर्काए ।
खेलको ५१ औं मिनेटमा दिनेशले गोल गर्दै टिमलाई २–१ गोलको अग्रता दिलाए । त्यसपछि खेलको ५८ औं मिनेटमा एजिकेलले व्यक्तिगत दोस्रो गोल गर्दै ललितपुरलाई ३–१ को अग्रता दिलाए ।
खेलको इन्जुरी समयमा हिजाजले गोल गरे पनि ललितपुरले ३–२ गोलको जित निकाल्न सफल भयो ।
जितसँगै ललितपुरले ७० लाख नगद पुरस्कार पाएको छ । भने उपबिजेतामा चित्त बुझाएको धनगढीले २० लाख नगद पुरस्कार पाएको छ ।