माघ ११, इलाम । झापाको बिर्तामोड युनाइटेड इलाम गोल्डकपको फाइनलमा प्रवेश गरेको छ ।
आज(बिहिबार) भएको दोस्रो सेमिफाइनलमा पाँचथर फुटबल क्लबलाई टाइब्रेकरमा ४–२ गोलान्तरले पराजित गर्दै बिर्तामोड फाइनलमा प्रवेश गरेको हो ।
बिर्तामोड झापा फाइनल प्रवेश गरेसँगै काठमाडौँको न्युरोड टिम (एनआरटी)सँग भिडन्त पक्का गरेको छ ।
निर्धारित समय गोलरहित बराबरीमा टुंगिएपछि खेल टाइब्रेकरमा धकेलिएको थियो ।
टाइब्रेकरमा बिर्तामोडको तर्फबाट दिवस उराउ, प्रदीप बुढाथोकी, रोहन कार्की र एन्जल गुरुङले गोल गरे । विशाल दर्जीको प्रहार पाँचथरका बलरक्षकले बचाउ गरे ।
पाँचथरको तर्फबाट साइमान लिम्बू र सुदीप श्रेष्ठले गोल गरे । अशोक खवासको प्रहार बिर्तामोडका बलरक्षकले बचाउ गरे भने बिजु भुजेलको प्रहार गोलपोस्टमा ठोक्किएर बाहिरियो ।
आजको खेलको म्यान अफ् दि म्याच बिर्तामोडका सञ्जित राई घोषित भए । फाइनल खेल आउँदो १३ गते शनिबार हुनेछ ।