माघ २५, काठमाडौं । नेपालले क्यानडाविरुद्धको एकदिवसीय सिरिजको पहिलो खेलमा रोमाञ्चक जित हात निकालेको छ ।
बिहीबार कीर्तिपुर स्थित त्रिवि मैदानमा सुरु भएको तीन म्याचको एकदिवसीय सिरिजको पहिलो खेलमा नेपालले क्यानाडामाथि ७ रनको रोमाञ्चक जित दर्ता गरेको हो ।
नेपालले प्रस्तुत गरेको २ सय २५ रनको लक्ष्य पछ्याएको क्यानडा १३ बल अगावै अलआउट हुँदै २ सय १७ रनमा समेटियो ।
क्यानाडाका लागि निकोलस कृतनले ६८ र प्रगत सिंहले ५० रन बनाउँदा हर्श ठाकरले ३२ र ओपनर आरोन जोनसनले २० रनको योगदान गरेका थिए । क्यानडाका अन्य ब्याट्सम्यानले भने दोहोरो अंकको स्कोर छुन सकेनन् ।
नेपालका लागि डेब्यु खेलमा रिजन ढकालले एक विकेट लिए । कप्तान रोहितले सर्वाधिक ४ विकेट लिएको खेलमा ललित राजवंशीले २ विकेट झारेका थिए । सोमपाल कामी, पवन सरार्फ र कुशल मल्लले समान एक एक विकेट चट्काएका थिए ।
यसअघि, टस जितेर पहिले ब्याटिङ गरेको नेपालले निर्धारित ओभरमा अलआउट हुँदै २ सय २४ रन बनाएको थियो ।
ओपनर कुशल भुर्तेलले ६२ रनको इनिङ्स खेल्दै नेपाललाई राम्रो सुरुवात दिलाएका थिए । आसिफ शेख र कप्तान रोहित पौडेललाई समान ८ रन बनाउदा भिम सार्कीले १७, कुशल मल्लले २० र आरिफ शेखले ३८ रन बनाउँदै नेपालको इनिङ्सलाई केही उकासेका थिए ।
यस्तै पवन सरार्फले १५, सोमपाल कामीले २७, रिजन ढकालले ४ र ललित राजवंशीले १ रन बनाए । सुर्य तामाङ १० रनमा नटआउट रहे ।
क्यानडाका उदय भगवानले सर्वाधिक ३ तथा साद बिन जफर र इशवरजोत सोहीले समान २ विकेट लिएका थिए । साहिद अहमदजई र हर्ष ठाकरले समान एक एक विकेट हात पारे ।
घरेलु मैदानमा डब्लूसीएल लिग टू अन्तर्गतका म्याच खेल्नुअघि नेपालले क्यानडालाई बोलाएर एकदिवसीय सिरिजको आयोजना गरेको हो । सिरिज अन्तर्गतको दोस्रो खेल शनिबार हुनेछ ।
नेपालको राष्ट्रिय टिममा सुर्य तामाङ र रिजन ढकालले डेब्यु गरेका छन् ।
