आत्मविश्वास, निरन्तर मिहिनेत र परिवारको अटुट साथ भए असम्भव भनिने लक्ष्य पनि सम्भव बन्न सक्छ भन्ने उदाहरण बनेकी छन् मोडल तथा कलाकार उपासना नेम्वाङ । कमर्स विषय अध्ययन गरिरहेकै क्रममा चार वर्षको शैक्षिक ग्यापपछि पनि पुनः कक्षा ११ बाट मानविकी संकाय रोज्दै शैक्षिक यात्रालाई निरन्तरता दिइन् । निरन्तर संघर्ष र धैर्यको परिणाम स्वरूप उनले समाजशास्त्रमा स्नातकोत्तर तह उत्तीर्ण गर्दै त्रिभुवन विश्वविद्यालयको ५१औँ दीक्षान्त समारोहबाट दीक्षित हुने गौरव हासिल गरिन् ।
त्रिपुरेश्वरस्थित दशरथ रंगशालामा प्रधानमन्त्री सुशिला कार्कीको प्रमुख आतिथ्यता तथा शिक्षा मन्त्री महावीर पुनको विशेष आतिथ्यतामा पुस १० गते आयोजित दीक्षान्त समारोहमा हजारौँ दीक्षित विद्यार्थीहरूमध्ये उपासना नेम्वाङ पनि एक प्रेरणादायी पात्रका रूपमा देखिइन् ।
आफ्नो संघर्ष स्मरण गर्दै उपासना भन्छिन्, ‘कलाकारिता, व्यवसाय र अध्ययनलाई एकैसाथ अगाडि बढाउनु सजिलो थिएन । यो यात्रा मेरा लागि चुनौतीपूर्ण मात्र होइन, मानसिक रूपमा पनि कठिन रह्यो । व्यस्त जीवनशैली र निरन्तर दबाबकाबीच पनि मैले अध्ययनलाई कहिल्यै पूर्णविराम दिइनँ ।’
उनी भावुक हुँदै थप्छिन्, ‘आमा–बुवाले देख्नुभएको सपना पूरा गर्न मैले दिन–रात मिहिनेत गरेँ । उहाँहरूको सुझाव, हौसला र विश्वासकै कारण म पुनः कक्षा ११ बाट निरन्तर अघि बढ्दै आज डिग्री हात पार्न सफल भएँ ।’
चार वर्षको अन्तरालपछि पुनः कक्षा कोठामा फर्कनु उनका लागि सजिलो थिएन । तर उपासनाले कहिल्यै हार मानिनन् । स्पष्ट लक्ष्य, आत्मअनुशासन र निरन्तर परिश्रमलाई मूल मन्त्र बनाएर उनले आफ्नो बाटो आफैँ निर्माण गरिन् । आज उनी केवल एक कलाकार मात्र होइनन्, शिक्षित, आत्मनिर्भर र सचेत महिलाको रूपमा पनि स्थापित भएकी छन् । उनको यो सफल यात्रामा परिवारको भूमिका अत्यन्त महत्वपूर्ण रहेको छ ।
अध्ययन बिचमै छोड्नु परेका, पुनः सुरु गर्ने साहस खोजिरहेका तथा जीवनका बहुआयामिक जिम्मेवारीहरूबिच सन्तुलन मिलाउन संघर्ष गरिरहेका युवायुवतीहरूका लागि उपासना नेम्वाङको शैक्षिक यात्रा प्रेरणाको उज्यालो दीप बन्नेछ । मेहेनती, परिश्रमी अनि आत्म निर्भर नारीको रुपमा समेत आफूलाई स्थापित गर्न सफल उपासना नेम्बाङलाई थप सफलता र उज्ज्वल भविष्यको कामना सहित लुङमेन्दीङ नोनिङवा ।
