चैत २२, काठमाडौं । नेपाल भियतनामसँग पेरिस ओलम्पिक महिला फुटबल अन्तर्गत एसिया छनोटको पहिलो चरणको पहिलो खेलमा पराजित भएको छ ।
बसधबार साँझ त्रिपुरेश्वरस्थित दशरथ रंगशालामा नेपाल भियतनामसँग ५-१ गोल अन्तरले पराजित भएको हो ।
भियतनामको जितमा कप्तान हुन्ह न्हुले दुई गोल गरिन् । यस्तै फाम हाइ यन, एनगुएन थि बिच थुए र एनगुएन थि नाले एक एक गोल गरे ।
नेपालका लागि सावित्रा भण्डारीले एक मात्र गोल फर्काईन् ।
खेलको ११ औं मिनेटमा फाम हाइ यनले गोल गर्दै भियतनामलाई सुरुवाती अग्रता दिलाइन् ।
खेलको ३६ औं मिनेटमा कप्तान हुन्ह न्हुले पेनाल्टीमार्फत गोल गर्दा भियतनामले २-० को अग्रता बनायो ।
यस्तै खेलको ३८ औं मिनेटमा एनगुएन थि बिच थुएले गोल गर्दै पहिलो हाफमा भियतनामलाई ३-० को अग्रता दिलाइन।
दोस्रो हाफमा भियतनामले थप दुई गोल गर्यो । नेपालले भने एक गोल फर्कायो ।
खेलको ४८ औं मिनेटमा थि लोनको क्रसमा कप्तान न्हुले हेडरमार्फत व्यक्तिगत दोस्रो गोल गर्दै भियतनामलाई ४-० ले अगाडी बढाइन ।
खेलको ७९ औं मिनेटमा सरु लिम्बूको पासमा सावित्राले गोल गर्दै नेपाललाई ४-१ को स्थितिमा ल्याए ।
त्यसपछि खेलको इन्जुरी समयमा एनगुएन थिले गोल गर्दै भियतनामलाई ५-१ को जित दिलाइन् ।
छनोटको समूह ‘सी’ मा रहेको नेपालले अब शनिबार भियतनामसँग दोस्रो खेल खेल्नेछ ।
