कातिक २६, माङसेबुङ । दोस्रो महागुरु फाल्गुनन्द कप फुटबल प्रतियोगिताको उपाधि आयोजक युथ अफ माङसेबुङले चुमेको छ ।
आइतबार इलामको माङसेबुङ ५, स्थित प्रस्तावित आत्मानन्द रंगशालामा सम्पन्न भएको फाइनल खेलमा डिफेन्डिङ च्याम्पियन आशिस स्पोर्टिङ क्लवलाई ३–२ गोल अन्तरले पराजित गर्दै आयोजकले उपाधि चुमेको हो ।
आयोजकको जितमा ओसन चाम्लिङ राईले दूई तथा अविरल परियारले एक गोल गरे । यता अशिसका लागि भने रोमन योगी र सन्दिप राईले समान एक गोल गरे ।
उपाधि चुमेसँगै आयोजकले नगद ४० हजार रुपैयाँको साथमा ट्रफी, मेडल र प्रमाण प्राप्त घरमै राखेका छन् । उपविजेतामा चित्त बुझाएको आशिस स्पोर्टिङ क्लवले भने नगद २० हजार रुपैयाँको साथमा ट्रफी, मेडल र प्रमाण प्राप्त गरेका छन् । उत्कृष्ट डिफेन्डर आशिस स्पोर्टिङ क्लवका रोमन योगी, उत्कृष्ट मिडफिल्डर युथ अफ माङसेबुङका विवेकहाङ साम्बा, उत्कृष्ट किपर आशिस स्पोर्टिङ क्लवका जमिन राई, उत्कष्ट खेलाडी युथ अफ माङसेबुङका ओसन राई र सर्वाधिक गोलकर्ता सिङफेरे एफसीका सुमन राई घोषित भएका छन् ।
विजेता तथा उपविजेता टिमका खेलाडीहरुलाई माङसेबुङ गाउँपालिका वडा नं ३ का वडाध्यक्ष लछुमन राई ‘जनम’ले वितरण गरेका थिए ।
महान समाज सुधारक, राष्ट्रिय विभूति मुहिङगुम अङसीमाङ महागुरु फाल्गुनन्द लिङ्देन १४० औं जन्मजयन्तीको अवसरमा युथ अफ माङसेबुङको आयोजनामा दोस्रो महागुरु फाल्गुनन्द कप फुटबल प्रतियोगिताको आयोजना गरिएको हो ।
