माङसेबुङ । नेपाल आईसीसी टी–२० विश्वकप एसिया तथा इस्ट एसिया पेसिफिक छनोटमा अपराजित यात्रा कायमै राख्दै प्रतियोगिताको उपाधि नजिक पुगेको छ ।
बुधबार भएको खेलमा ओमानलाई ३८ रनले हराउँदै नेपाल अपराजित यात्रा कायमै राख्दै छनोट प्रतियोगिताको उपाधिको नजिक पुगेको हो ।
नेपालले दिएको १५२ रनको लक्ष्य पछ्याएको ओमानले २० ओभरमा ९ विकेट गुमाएर ११३ रनमा समेटियो ।
ओमानका लागि विनायक शुम्लाले सर्वाधिक ३२ रन बनाए । यस्तै मोहम्मद नदीमले २५ रन बनाए ।
नेपालका लागि गुल्शन झाले सर्वाधिक ३ विकेट लिए । यस्तै नन्दन यादव र सोमपाल कामीले २–२ विकेट तथा सन्दीप लामिछानेले १ विकेट लिए ।
यसअघि टस जितेर पहिले ब्याटिङ गरेको नेपालले २० ओभरमा ९ विकेट गुमाएर १५१ रन बनाएको थियो ।
नेपालको जितमा कुशल भुर्तेलले सर्वाधिक ६९ रन बनाए । यस्तै आसिफ शेखले २४ रन, गुल्शन झाले १८ रन तथा आदिल आलमले १६ रन बनाए ।
ओमानका लागि नदीम खानले सर्वाधिक ४ विकेट लिए । यस्तै शुफिया मेहमुद र जितेन रामानन्दीले २–२ विकेट लिए ।
नेपाल र ओमान दुवै विश्वकपमा छनोट भइसकेका छन् । आजको जितपछि नेपाल ४ खेलमा ८ अंक जोडेर शीर्षस्थानमा उक्लिएको छ ।
नेपालले अब शुक्रबार सामोआसँग खेल्नेछ ।
