काठमाडौं । नेपाल प्रिमियर लिग (एनपीएल)मा चितवन राइनोजसँग विराटनगर किंग्स पराजित भएको छ ।
कीर्तिपुरस्थित त्रिवि क्रिकेट मैदानमा बुधबार भएको खेलमा विराटनगर चतवनसँग ४८ रनले पराजित भएको हो । यो सँगै बिराटनगरको अपराजित यात्रामा चितवनले ब्रेक लगाएको छ ।
चितवनले दिएको १७५ रनको लक्ष्य पछ्याएको विराटनगरले १६.५ ओभरमा सबै विकेट गुमाउँदै १२६ रन मात्रै बनाउन सक्यो ।
चितवनको यो दोस्रो जित हो । विराटनगरको भने यो पहिलो हार हो । विराटनगरका मर्चेन डी लिङ्गेले सर्वाधिक ३९ रन बनाए । यस्तै प्रतिश जिसीले ३० रन र साम हिजलेट २२ रनको योगदान दिए ।
चितवनका रञ्जित कुमारले सर्वाधिक ५ विकेट लिए । यस्तै कमलसिंह ऐरीले २ तथा शोहेल तान्वीर, सैफ जैब र कुशल मल्लले समान १ विकेट लिए ।
यसअघि टस हारेर पहिला ब्याटिङ थालेको चितवनले ५ विकेट गुमाउँदै १७४ रन बनाएको थियो ।
चितवनका रवी बोपाराले सर्वाधिक ६५ रन बनाए । उनको यो जारी प्रतियोगितामा लगातार तेस्रो अर्धशतक हो । यसैगरी सैफ जैबले ३२ रन, देव खनालले २८ रन र डेबिड मिलानले १७ रन बनाउँदा कुशल मल्लले अविजित २० रन बनाए ।
विराटनगरका सन्दीप लामिछाने र मर्चेन्ट डी लेङ्गेले समान २ विकेट लिए ।
