काठमाडौं । नेपाल प्रिमियर लिग (एनपीएल)मा सन्दीप लामिछाने नेतृत्वको विराटनगर किंग्सले चौंथो जित निकालेको छ ।
कीर्तिपुरस्थित टीयू अन्तर्राष्ट्रिय क्रिकेट मैदानमा शुक्रबार भएको खेलमा कर्णाली याक्सविरुद्ध ३ विकेटको रोमाञ्चक जित निकालेको हो ।
यो सँगै बिराटनगर ५ खेलबाट ८ अंक जोडेर अंक तालिकाको दोस्रो स्थानका उक्लिएको छ । शीर्ष स्थानको सुदुरपश्चिम रोयल्ससँग अंक बराबरी गरेको छ ।
विराटनगरको जितमा नायक बनेका बसिर अहमदले नटआउट ६२ रन बनाए । यस्तै नारायण जोशीले २५ रन, साहिल पटेलले १९ रन र साम हेजलेटले १६ रन बनाए ।
कर्णालीका सोमपाल कामी र गुलसन झाले समान २ विकेट लिए । यस्तै पवन सरार्फ, नन्दन यादव, विलियम बोसिस्टोले समान एक विकेट लिए ।
यसअघि पहिला ब्याटिङ गरेको कर्णालीले तीन विकेट गुमाएर १ सय ६० रन बनाएको थियो ।
कर्णालीका लागि प्रियांक पञ्चलले सर्वाधिक ६३ रन बनाए । यस्तै विलियम बोसिस्टोले नटआउट ४८ रन र गुलसन झाले २० रन जोडे थिए ।
विराटनगरका सन्दीप लामिछाने र मर्चेन्ट डी ल्याङले समान एक विकेट लिएका थिए ।
