भदौ २४, एजेन्सी । बेलायतकी महारानी एलिजाबेथ द्वितीयाको निधन भएको छ ।
स्कटल्याण्डस्थित बाल्मोरल क्यासलमा बस्दै आईरहेकी एलिजाबेथको ९६ वर्षको उमेरमा बिहीवार उनको निधन भएको हो । प्रत्येक गर्मीमा उनी त्यहाँ जाने गर्थिन् ।
स्वास्थ्यमा समस्या भएदेखि उनी चिकित्सकको रेखदेखमा रहेकी । गत वर्षदेखि नै उनको स्वास्थ्यमा समस्या देखिएको थियो । गत माघमा उनी कोभिड–१९ संक्रमित भएकी थिइन् ।
महारानी एलिजाबेथ द्वितीयाले कन्जरभेटिभ पार्टीकी नेता लिज ट्रसलाई मंगलवार औपचारिक रूपमा बेलायतकी नयाँ प्रधानमन्त्री नियुक्त गरेकी थिइन् ।
उनले बेलायतका १५ जना प्रधानमन्त्रीलाई शपथ दिलाएकी थिइन् । उनले करिब ७० वर्षसम्म बेलायतमा शासन गरिन् ।
