भदौ २७, माङसेबुङ । एसिया कप क्रिकेटको उपाधि आयोजक श्रीलंकाले जितेको छ ।
आइतबार राति दुबई अन्तराष्ट्रिय क्रिकेट मैदानमा भएको फाइनलमा पाकिस्तानलाई २३ रनले हराउँदै श्रीलंकाले सो उपाधि जितेको हो ।
श्रीलंकाले दिएको १ सय ७१ रनको लक्ष्यसहित जवाफी ब्याटिङ गरेको पाकिस्तानले २० ओभरमा अलआउट हुँदै १ सय ४७ रन मात्र बनाउन सक्यो ।
पाकिस्तानका लागि मोहमद रिजवानले ५५ रनको अर्धशतकीय इनिङ खेल्दा इफ्तिखर अहमेदले ३२ तथा हरिस राउफले १३ रन बनाए ।
श्रीलंकाका प्रमोद मधुसनले ४ तथा वानिन्दु हसरंगा डी सिल्भाले ३ विकेट लिदा चामिका करुनारत्नेले २ विकेट लिए ।
यसअघि टस हारेर पहिले ब्याटिङ गरेको श्रीलंकाले २० ओभरमा ६ विकेट गुमाएर १ सय ७० रन बनाएको थियो ।
श्रीलंकाका लागि भानुका राजपाक्षेले अविजित रहदै ७१ रनको अर्धशतकीय इनिङ खेल्दा चामिका करुनारत्नेले अविजित १४ रन बनाए ।
यस्तै वानिन्दु हसरंगा डी सिल्भाले ३६ तथा धनन्जय डी सिल्भाले २८ रन बनाए ।
पाकिस्तानका हरिस राउफले ३ विकेट लिदा निशम शाह, शादब खान र इफ्तिखर अहमेदले १/१ विकेट लिए ।
यससँगै श्रीलंका छैटौं पटक एसिया कपको उपाधि जित्न सफल भएको छ । श्रीलंकाले आठ वर्षपछि उपाधि जितेको हो ।
यसअघि सन् २०१४ मा बंगलादेशमा भएको एसिया कपमा श्रीलंकाले पाकिस्तानलाई नै हराएर उपाधि जितेको थियो ।
पाकिस्तान भने तेस्रो पटक उपाधि जित्न असफल भएको छ ।
