भादौ ११, दमक । लिम्बू जातिको जातीय संस्था किरात याक्थुङ चुम्लुङको ३५ औं स्थापना दिवस झापामा सप्ताहव्यापी कार्यक्रमसहित मनाइने भएको छ ।
चुम्लुङको जिल्ला समिति झापाले यसका लागि जिल्लास्तरीय दुई वटा समिति गठन गरेर भाद्र १० देखि १७ गते सम्म जिल्लाका विभिन्न ६ स्थानमा गरिने कार्यक्रमहरुका बारेमा जानकारी गराएको हो ।
चुम्लुङका कार्यक्रमहरुबारे जानकारी दिन शनिबार दमकमा आयोजित पत्रकार सम्मेलनमा चुम्लुङका अगुवा नेतृत्वकर्ता तथा अभियान्ताहरुले यसपटकको चुम्लुङको स्थापना दिवस विशेष महत्वसाथ मनाइन लागेको बताए ।
उनीहरुले चुम्लुङको इतिहासमै पहिलो पटक ७ दिने विभिन्न कार्यक्रमहरु गर्न लागिएको र यसका लागि आवश्यक पर्ने ७ लाख रुपैयाँ भन्दा बढी बजेट आयोजक समिति भित्रैबाट निश्चित दायरा बनाएर बन्दोबस्ती गर्ने काम भइरहेको पनि बताएका छन् ।
मूल आयोजक समितिका संयोजक समेत रहेका चुम्लुङ झापाका अध्यक्ष सेसेहाङ फियाकले जवरजस्त रुपमा भएको कोशी प्रदेश नामांकन खारेजीको आन्दोलनका रुपमा समेत यस पटकको स्थापना दिवस मनाउन लागिएको बताए ।
उनका अनुसार भाद्र १० गते स्थापना दिवस विशेष कार्यक्रमको चुम्लुङका पूर्व केन्द्रिय उपाध्यक्ष धिरेन लावतीले उदघाटन गर्नेछन् । सोको भोलिपल्ट ११ भाद्रमा गौरादह शाखाको व्यवस्थापनमा विभिन्न जातीय संस्थाहरु समेतको सहभागितामा शुभकामना आदनप्रदान, १२ गते मेचीनगर ८ स्थित चुम्लुङहिममा संघीय उपाध्यक्ष डा. कमल तिगेलाको प्रमुख उपस्थितीमा गायिका गंगा फियाक लगायत स्थानीय कलाकारहरुको विशेष प्रस्तुतिसहित संस्थालाई विशेष योगदान पुरयाउने व्यक्तित्वहरुलाई सम्मान तथा लिम्बूजातिको लोकनाच केलाङ प्रस्तुत गरिनेछ । प्रतियोगितात्मक केलाङ नृत्यमा प्रथम हुनेलाई ५० हजार , दोश्रोलाई ३० हजार, तेश्रोलाई २० हजार र चौथो हुने टोलीलाई नगद १० हजार र प्रमाणपत्र प्राप्त गर्ने छन् । सो प्रतियोगितामा जिल्लाका १३ वटा चुम्लुङ शाखाका नृत्य टोली सहभागि हुने छन् ।
त्यस्तै १३ गते चुम्लुङ कमल शाखाको व्यवस्थापनमा नेपाल प्रज्ञा प्रतिष्ठानका प्राज्ञ समालोचक मुनाराज शेर्मा र बिमला पालुङवाको उपस्थितिमा विशेष सम्मानसाथै आन्तरिक केलाङ प्रस्तुत गरिने जनाइएको छ । त्यस्तै भाद्र १४ गते भद्रपुरमा, १५ गते चुम्लुङ जिल्ला कार्यालयमा मातृभाषा गोष्ठी तथा १६ र १७ गते विर्तामोडस्थित सिटी सेन्टरमा जिल्लास्तरीय केलाङ प्रतियोगिता, गायक गायिकाहरुको विशेष प्रस्तुति, चुम्लुङ इजरायल छात्रवृत्ति र याक्थुङ सहयोग कोषद्धारा प्रदान गरिने छात्रवृत्ति प्रदान गर्नुका साथै जिल्ला शाखा चुम्लुङलाई विशेष योगदान पुर्याउने व्यक्तित्वहरुलाई विशेष सम्मान गरिने जनाइएको छ । कार्यक्रमको दौरानमा संकलन भएको सहयोग रकम आवश्यक खर्च कटौती गरेर चुम्लुङको कोषमा जम्मा गरिने पनि पत्रकार सम्मेलनमा जनाइएको छ ।
पत्रकार सम्मेलनमा चुम्लुङकी संघीय सदस्य इक्सा सम्बाहाम्फे ,राष्ट्रिय चुम्लुङ सदस्य गुमानसिंह सम्बाहाम्फे, कमल शाखा अध्यक्ष दिवस लिम्बू ,जिल्ला सदस्य बन्दना नेम्बाङ लगायतले पनि स्थापना दिवसको विविध बिषयमा जानकारी गराएका थिए ।
