कातिक १३, माङसेबुङ । इलामको माङसेबुङ गाउँपालिकाले वर्षाका कारण स्थगन गरेको लगत प्रविष्टिको निस्सा वितरण कार्य पुनः सुचारु हुने भएको छ ।
पालिकाले भूमिहीन दलित, भूमिहीन सुकुम्बासी र अव्यवस्थित बसोबासीहरुको लगत प्रविष्टिको निस्सा वितरण पुनः बुधबार देखि निस्सा वितरण गर्ने भएको हो ।
गत महिनाको १६ गते औपचारिक कार्यक्रम गरी वडा कार्यालयहरुबाट भूमिहीन दलित, भूमिहीन सुकुमबासी र अव्यवस्थित बसोबासीलाई जग्गा भोगचलनको निस्सा वितरण कार्य सुरु गरेको भए पनि वर्षाका कारण भौगोलिक कठिनाइ परेको भन्दै सो कार्य स्थगित भएको थियो ।
माङसेबुङ गाउँपालिकाले जारी गरेको सूचना अनुसार कातिक १५ गतेबाट १८ गतेसम्म बाँकी रहेका ४ वटा वडामा निस्सा वितरण हुने उल्लेख छ । वडा नम्बर २ मा १५ गते, वडा नम्बर १ मा १६ गते, वडा नम्बर ५ मा १७ गते र वडा नम्बर ४ मा १८ गते सबन्धित वडा कार्यालयहरुबाट प्रत्येक दिन बिहान १० बजेबाट निस्सा वितरण हुने बताइएको छ ।
निस्सा लिन सम्बन्धित व्यक्तिले आफ्नो नागरिकता लिएर वा सम्बन्धित व्यक्ति नभए एकाघरको नाता खुल्ने व्यक्तिले वडाको सिफारिसका आधारमा नागरिकता पेश गरेर निस्सा बुझ्न सक्ने समेत जारी सूचनामा उल्लेख छ ।
