बिहीबार इलाका प्रहरी कार्यालयअगाडि नाराबाजी गर्दै मृतकका आफन्त
कातिक ९, झापा । झापाको दमक–९ का ३८ वर्षीय यामु निरौलाको हत्या प्रकरणमा पीडित पक्षले बिहीबार पूरक जाहेरी दर्ता गराएको छ । मृतककी श्रीमती कृष्णमाया निरौलाले बिहीबार इलाका प्रहरी कार्यालय दमकमा पूरक जाहरी दर्ता गराएकी हुन् ।
बिहीबार दर्ता भएको पूरक जाहेरीमा दमक ८ का नमकुमार चेम्जोङको समेत नाम उल्लेख भएको जिल्ल प्रहरी कार्यालय झापाले पुष्टि गरेको छ । विवादित दमक ३ को जग्गा प्रकरणमा चेम्जोङको नाम जोडिने र घटनास्थालमा उनको उपस्थिति रहने प्रमाण सीसीटिभी फुटेजमा रहेको भन्दै पूरक जाहेरी दिएको मृतकका परिवारको भनाइ छ ।
बिहीबार दिउँसो पनि पीडित पक्षले पूरक जाहेरी दर्ताका लागि दिनभर इलाका प्रहरी कार्यालय दमकमा धर्ना दिएका थिए । उनीहरुले इ.प्र.का. दमक घेराउ गर्दै एमाले अध्यक्ष एवम् प्रधानमन्त्री केपी शर्मा ओलीविरुद्ध नाराबाजीसमेत गरे ।
निरौला कुटपिट र हत्या प्रकरणमा ज्यान मारेको तीन दिनसम्म पनि घटनामा संलग्न व्यक्तिहरुलाई राजनीतिक संरक्षणकै कारण पक्राउ नगरिएको पीडित पक्षले आरोप लगाएको छ ।
एमाले कार्यकर्ता एवम् प्रदेश सभा सदस्य होम थापाका भाइ बुद्धिमान थापासहित अन्य ५ जनाविरुद्ध बुधबार पनि पीडित पक्षले दिनभर दवाव दिएपछि मात्रै किटानी जाहेरी दर्ता भएको थियो ।
बुधबार परेको जोहेरीमा दमक–८ का थापासहित दमक–३ का राजु भनिने सेरबहादुर नेम्बाङ, संखुवासभा मादी नगरपालिका–१० घर भई दमक–३ बस्ने गणेश दर्जी, मोरङ उर्लाबारी–६ का प्रकाश कार्की, उर्लाबारी–७ का ध्रुव गौतम र सुनसरी इटहरीका डेबिड घलेको नाम उल्लेख छ ।
जिल्ला प्रहरी कार्यालय झापाले समेत पीडित परिवारले किटानी जाहेरी दिएका मध्ये दुई जना बाहेक अन्यलाई पक्राउ गर्न नसकिएको बताएको छ । प्रहरीले हत्याको आरोप लागेकाहरुलाई फक्राउ गर्न सक्रियता नदेखाएको भन्दै मृतकका परिवारले निरौलाको शव बुझ्न मानेका छैनन् । हत्यामा संलग्नहरु पक्राउ परिपछि मात्रै शव बुझ्ने मृतकका परिवारको अडान छ ।
निरौलाको मंगलबार दमक–३ स्थित मावा खोला नजिक रहेको विवादित जग्गामा जेसीभी लगाउने र रोक्ने समूहबीचको विवादमा कुटपिट हुँदा मृत्यु भएको थियो ।
विवादति जग्गामा जेसीभी लगाएर सम्याउने क्रममा दुई पक्षबीच झगडा हुँदा निरौलामाथि कुटपिट भएको र उनी घटनास्थलमै ढलेको स्थानीयले जनाएका छन् ।
