दमक/शनिबारदेखि सुरु भएको सहीद स्मारक ए डिभिजन लिगमा मच्छिन्द्र क्लबले विजयी सुरुवात गरेको छ ।
४३ औँ संस्करणको उद्घाटन खेलमा मच्छिन्द्र फुटबल क्लबले ब्रिगेड ब्वाइज क्लबलाई २–० ले पराजित गरेको हो ।
शनिवार एन्फा टेक्निकल सेन्टर सातदोबाटोमा खेल भएको हो । मच्छिन्द्रको जितमा योगेश गुरुङले खेलको २९ औँ मिनेटमा पहिलो गोल गरेका थिए ।
त्यस्तै मनाङ मस्र्याङदीका पूर्व स्ट्राइकर दीपक राईले दोस्रो हाफको ५० औँ मिनेटमा अर्को गोल थपेका थिए ।
त्यसपछि कुनै पनि टिमले गोल गर्न नसकेपछि मच्छिन्द्रले खेल २–० ले आफ्नो पक्षमा पारेको हो ।
यससँगै मच्छिन्द्रले २ अंक जोडेको छ । यसअघिको संस्करणमा अन्तिमबाट दोस्रो स्थानमा रहेकाले मच्छिन्द्रको खातामा १ अङ्क घटाएर २ अंकमात्र जोडिने भएको हो ।
