एजेन्सी / लकडाउन खुकुलो पारिएसँगै विश्व स्वास्थ्य संगठन (डब्ल्युएचओ)ले पछिल्लो २४ घन्टामा कोरोना भाइरस संक्रमितको संख्या अहिलेसम्मकै उच्च विन्दुमा पुगेको जनाएको छ ।
विश्व स्वास्थ्य संगठन अनुसार पछिल्लो २४ घन्टामा संसारभर १ लाख ८३ हजार २० जनामा कोरोना भाइरसको संक्रमण पुष्टि भएको जनाएको छ ।
लकडाउन खुकुलो पारिएसँगै दक्षिण अमेरिकी देश र दक्षिण एसियाली देशमा कोरोना भाइरस संक्रमितको संख्या ह्वात्तै बढेको जनाएको छ ।
दक्षिण एसियाका भारतलगायतका देशमा पनि संक्रमितको संख्या दैनिक रेकर्डमा पुग्न थालेको छ । पछिल्लो २४ घन्टामा भारतमा १५ हजार भन्दा धेरैमा संक्रमण पुष्टि भएको छ ।
संसारभर कोरोना भाइरस संक्रमितको संख्या ९० लाख ४६ हजार २ सय १५ पुगेको छ । यसैगरि ४ लाख ७० हजार ७ सय ३ जनाले ज्यान गुमाएका छन् । अहिलेसम्म ४८ लाख ३८ हजार ३ सय ५९ जना उपचारपछि घर फर्किएका छन् ।
