बिराटानगर । जनता समाजवादी पार्टी नेपालका अध्यक्ष उपेन्द्र यादवले नेकपा एमाले अध्यक्ष केपी शर्माओली हिटलर जस्तै निर्वाचित तानाशाह बन्न खोजेकोले उनको पतन भएको बताएका छन् ।
अध्यक्ष यादबले संविधान संशोधनको लागि सहकार्य गरेको बताउँदै, संशोधन नगर्ने नियत बुझेपछि ओलीसँगको सहकार्य अन्त्य भएको बताए ।
‘लिपुलेक र कालापानीसहितको नक्सा जारी गरेर ओलीले ढोँगी राष्ट्रवादको खोल ओढेका थिए । तर त्यसको केही दिनमै नक्कली राष्ट्रवाद उदांगियो ।’ अध्यक्ष यादबले भने– ‘ओलीको तानशाही सपना चकनाचूर पारेर संघीय लोकतान्तिक गणतन्त्रलाई दिगो बनाउने काम जसपाले गरेको छ । यो ओलीकै लागि पनि फाइदाको कुरा हो । उनको सांसद पद सुरक्षित छ ।’
उनले लोकतन्त्रको रक्षाको लागि गठबन्धनले सार्वजनिक गरेको न्यूनतम साझा कार्यक्रमको आधारमा जसपा चाडै नै सरकारमा सहभागी हुने बताएका छन् ।
जसपाको सात वटै प्रदेशमा आव्हान गरिएको प्रदेश स्तरीय पार्टी सुदृढीकरण एवं जनजागरण अभियान अन्तर्गत बुधबार विराटनगरमा आयोजित कार्यक्रमलाई सम्बोधन गर्दै अध्यक्ष यादवले भने,– ‘संघीय गणतन्त्र, सामाजिक न्याय, जनताको आधारभूत आवश्यकता, न्यूनतम साझा कार्यक्रम र जसपाको एजेन्डालाई मुख्य आधार बनाएर आगामी हप्ताभित्रै सरकारमा सहभागी हुन्छौं ।’
केही बेइमानहरुले जसपाले थालेको लडाइँको मैदान छाडेर ओलीकै टाङ्गमुनि छिर्ने काम गरेको टिप्पणी गर्दै उनले भने, ‘महन्थ ठाकुर एण्ड कम्पनी ओलीकै असंवैधानिक र अवैध कदमको साथ लागेर मन्त्री हुन गए र समाप्त भए । हिजो पनि उनीहरुको दाउँ मन्त्री मात्र बन्ने थियो, आज पनि त्यही चरित्र देखिँदैछ ।’
महन्थलाई प्रधानमन्त्री बनाउँछु भनेपछि मानेका थिए । कांग्रेस पनि सकारात्मक थियो । त्यो सम्भव थियो । तर महन्थ हस्ताक्षर गरेको २ घण्टामै सहमति तोडेर भागे ।
अरुको इशारामा ओलीपथमा लाग्दा आज बेहाल भयो । आज निर्वाचन आयोगमा गुट दर्ता गर्न पुगेका ठाकुर समूहबाट मधेसको मुद्दा पार लाग्छ भन्नू भ्रम सिवाय अरु होइन ।
जसपा अध्यक्ष यादवले निर्वाचन आयोगले दिएको आधिकारिताको हिबासले जसपा फुटेको नभई प्रतिगमनका केही मतियारहरु भागेको टिप्पणी गर्दै युद्ध र अभियानमा हिँड्दा केही कमजोरहरु बाटोमै छोडिएका छन् । पूर्व राजपाका ९०% नेता कार्यकर्ता आज पनि जसपामै छन् ।
‘८०% केन्द्रीय सदस्य जसपाको बैठकमा सहभागी छन् । रुखको बोक्रा सुकेर उप्किएको मात्रै हो । पार्टी फुटेको छैन,– यादवले भने ।
कार्यक्रमलाई सम्बोधन गर्दै जसपाका वरिष्ठ नेता अशोक कुमार राईले नेपाली राजनीतिमा अन्तर्राष्ट्रिय राजनीतिक हस्तक्षेप बढेर गएकोले जनता समाजवादी पार्टीले नेपाली राजनीतिलाई केलाएर अघि बढ्नुपर्ने अवस्था रहेको बताए ।
जसपाका वरिष्ठ नेता राईले भने,– ‘हिन्द–प्रशान्त रणनीतिको ज्वाराभाटले हामीलाई छुनेवाला छ । नेपालमा सहज राजनीति हुने छैन । नेपाली राजनीति अहिले फुकीफुकी पाइला चाल्नु पर्ने अवस्थाबाट गुज्रिरहेको छ ।
प्रतिगामी ओली कदमसँग आमनेसामने हुँदै आउँदा ओली प्रवृत्तिको पतन भएको भन्दै उनले नयाँ सरकार र नयाँ प्रवृत्तिको जन्म भएको छ, अब यसलाई अगाडि लिएर जाने जिम्मेवारी जसपाको काँधमा आएको बताए ।
‘केही मानिस पार्टी बाहिर गएका छन्, पार्टीबाट कार्बाही गरेर निकालिएको हो । अब पार्टीलाई जनजनको मनमनमा पुर्याउने जिम्मेवारी हाम्रो काँधमा आएको छ । पार्टी सङ्गठन सुदृढीकरण तथा जनजागरण अभियान (सुज) मार्फत् जसपा अब जनतामा पुग्नेछ,– उनले भने ।
यसैगरी, जनता समाजवादी पार्टीका नेता महेन्द्र राय यादवले जसपाको एकतालाई ऐतिहासिक संज्ञा दिँदै पार्टी विरोधी एकता नचाहने तत्व मात्रै बाहिरिएको टिप्पणी गरे ।
‘यो देशका उत्पीडितहरुको राजनीतिक र भावनात्मक एकता नै आजको जसपा हो, यादवले भने,– ‘अहिले पार्टी छोडेर गएकाहरुले हिजो पनि पार्टी एकताको प्रयासलाई रोकेका थिए । त्यसको प्रमाण म पूर्व राजपा समूहको ६ घटक मध्येको एक जना म साक्षी छु ।’
पहिचानसहितको सङ्घीयता स्थापित गर्ने लक्ष्य पूरा गर्ने जिम्मेवारी जसपाको काँधमा आएको भन्दै उनले जनताको अधिकार स्थापित गर्न एकतामार्फत् ऐतिहासिक जिम्मेवारी जनताले हामीलाई दिएको बताए ।
‘यो एकता बचाउन दृढतापूर्वक लाग्नुपर्छ । केही बेइमानहरु प्रतिगमनको मतियार बनेर गएका छन् । हिमाल, पहाड, मधेस÷तराईलाई जोड्ने र राष्ट्रिय एकता मजबूद पार्ने पार्टी जसपा नै हो,– यादवले भने ।
संविधान संशोधनको लागि र शासकीय स्वरूप र निर्वाचन प्रणाली परिवर्तन गर्न जसपाले अग्रसरता लिएको भन्दै उनले भने,– ‘हामी प्रत्यक्ष निर्वाचित राष्ट्रपतिय प्रणालीको पक्षमा छौं । खर्चिलो र भ्रष्टाचारको जड निर्वाचन प्रणाली हटाएर पूर्ण समानुपातिक निर्वाचन प्रणाली कायम गर्ने हाम्रो मुद्दा हो ।’
त्यस्तै, जसपा उपाध्यक्ष रकम चेम्जोङले संसद् बिघटन र प्रतिगमनलाई परास्त गर्ने प्रमुख शक्ति जसपा नै रहेको दाबी गरे ।
‘कांग्रेससहितको तानाशाह र प्रतिगमन विरुद्धको मोर्चाले नै मुलुक र संविधान जोगाएको भन्दै उनले आगामी चुनावबाट ओली र उनी जस्ता प्ररिगामीहरुलाई परास्त गरे मात्र गणतन्त्र, सङ्घीयता, धर्म निरपेक्षता र समानुपातिक समावेशीता स्थापित हुने बताए । कम्तिमा आगामी चुनावसम्म वर्तमान मोर्चा जोगाउनु पर्नेमा जोड दिँदै उनले जसपाले नै त्यो वातावरण निर्माण गर्ने अठोट ब्यक्त गरे ।
