दमक । राष्ट्रिय शहिद राजकुमार आङदेम्बे माङतोकको १४औं स्मृतिसभा सम्पन्न भएको छ ।
शहिद राजकुमार आङदेम्बे माङतोक–मनिल तामाङ् स्मृति प्रतिष्ठानको आयोजनामा कमल ३ स्थित सानो केर्खा माङतोक समाधिस्थलमा १४ वटा दिप प्रज्वलन गरि कार्यक्रम आयोजना गरिएको थियो ।
प्रतिष्ठानका अध्यक्ष एवम् संघीय लोकतान्त्रिक राष्ट्रिय मञ्च तथा लिम्बुवान मञ्चका बरिष्ठ उपाध्यक्ष ज्ञान बहादुर गुरुङले दिप प्रज्वलन गरी कार्यक्रमको उद्घाटन गरेका थिए ।
कार्यक्रमलाई सम्बोधन गर्दै गुरुङले राष्ट्रिय सहिद माङतोकको शहादत्ताले लिम्बुवान र पहिचानको आन्दोलनले सार्थकता पाएको र निरन्तर अघि बढिरहेको बताए । शहिदको सपनालाई संस्थागत गर्न यो प्रतिष्ठान निर्माण गरिएको बताउँदै गुरुङ्ले भने समानुपातिक समावेशीताको मुद्दा स्थापित गर्न पहिलो शहिद हुनुभएका माङ्तोक र मनिलले चिरस्थायी र अमर बनाउन प्रतिष्ठान निर्माण भएको हो ।
त्यसैगरी कार्यक्रमलाई लिम्बुवान प्रान्तीय महासचिवहरु अशोक चेम्जोङ, शान्ता योङहाङ र थाङसाङ लावतीले श्रद्धाञ्जली मन्तव्य राख्दै शहिदको बलिदानीलाई संस्थागत गर्न लिम्बुवान आन्दोलन निरन्तर अघि बढिरहेको बताए । त्यसैगरी प्रान्तीय सदस्य बलनाथ नाल्बोले पनि शहिद माङतोकको चर्चा गरेका छन् ।
कार्यक्रममा लिम्बुवान प्रान्तीय सदस्य तथा चुलचुली वडा नं. १ का अध्यक्ष पूर्ण लावती (ध्रुव)ले स्वागत मन्तव्य राखेका थिए भने कार्यक्रमको सहजीकरण प्रतिष्ठानका महासचिव दिल कुमार लावतीले गरेका थिए ।
कार्यक्रममा संघीय लोकतान्त्रिक राष्ट्रिय मञ्चका उपाध्यक्ष ज्ञानुहाङ इम्बुङ, उपाध्यक्ष एबी पन्धाक, उपमहासचिव भविराज तुम्सा, सचिव पूर्णकला लिम्बु तेयुङ, सचिवालय सदस्य भिम सुनुवार, प्रान्तीय सदस्यहरु जीवन प्रकाश सेर्मा, सन्तोष तुम्बापो, दिपक आङदेम्बे, कुमार तुम्बापो, पूर्ण लावती (ध्रुव), सुर्य योक्पाङ्देन, किरण लिङ्देन, पहिचान सदस्य दिल सेरेङ्, इलाम जिल्ला अध्यक्ष दिपक योङहाङ, लिम्बुवान भोलेन्टियर्स केन्द्रीय सिनियर कमाण्डर सुमन सम्बाहाम्फे लगायत नेताहरुको उपस्थिति रहेको थियो ।
यसैगरी आज संघीय लिम्बुवान मञ्च, नेपाल ताप्लेजुङ्, पाँचथर, मोरङ्, धनकुटा, सुनसरी, झापाका विभिन्न स्थानीय तह लागत इलामको चुलाचुलीमा शहिद राजकुमार आङदेम्बेको शालिकका दिप प्रज्वलन गर्दै शहिद माङतोकलाई स्मरण गरेका छन् ।
