माङसेबुङ । इलामको माङसेबुङ गाउँपालिकाको स्थानीय तह निर्वाचनको मतगणनामा नेकपा एमालेले थप अग्रता बढाएको छ ।
गठबन्धनका तर्फबाट नेपाली कांग्रेसका उम्मेद्वार डिकेन्द्र इदिङ्गोलाई १ सय ४८ मतान्तरले पछि पार्दै नेकपा एमालेका उम्मेद्वार हेमन्त राईले अग्रता बढाएका हुन् ।
७ हजार ११ मतगणना हुँदा एमालेका राईले ३ हजार १ सय ६५ मतका साथ अग्रता लिएका छन् । उनका प्रतिष्पर्धी इदिङ्गोले ३ हजार १७ मत प्राप्त गरेका छन् ।
त्यस्तै उपाध्यक्ष पदमा भने गठबन्धनका तर्फबाट जनता समाजवादी पार्टीका उम्मेद्वार विनोद नेम्बाङले भने ५ सय ५६ मतान्तरका साथ अग्रता कायम राखेका छन् । नेम्बाङले ३ हजार ७३ मत पाउँदा उनका प्रतिष्पर्धी एमालेकी उम्मेद्वार सुनिता सुब्बाले २ हजार ५ सय १७ मतका साथ पच्छाइरहेका छन् ।
माङसेबुङमा १२ हजार ५ सय ६८ मतदातामध्ये ८ हजार ३ सय ७ मत खसेको थियो । अस्ती रातिदेखि सुरु भएको मतगणना हालसम्म वडा नम्बर १, ४, ५ र ६ को सम्पन्न भइसकेको छ । जसमा १ मा नेकपा माओवादी केन्द्र, ४ र ६ मा नेकपा एमाले र ५ मा राष्ट्रिय जनमुक्ति विजयी भईसकेको छ । अहिले वडा नम्बर २ र ३ को मतगणना जारी छ ।
