भदौ १४, काठमाडौं । काठमाडौंमा संघीय लोकतान्त्रिक राष्ट्रिय मञ्चले प्रदेश स्तरीय वैचारिक राजनैतिक तथा सैद्धान्तिक प्रशिक्षण कार्यक्रम गरेको छ ।
आगामी मंसिर ४ को प्रदेश तथा प्रतिनिधिसभा निर्वाचनमा सहभागी हुने बारेमा मञ्चका संघीय अध्यक्ष कुमार लिङदेन मिराकले पार्टी प्रशिक्षण दिएका हुन् ।
मञ्चका संघीय, प्रदेश ३ का नेता तथा उपत्यकामा रहेका नेताहरुलाई पहिलो चरणको प्रशिक्षण दिदैं अध्यक्ष लिङ्देन आउने निर्वाचनमा मञ्चलाई राष्ट्रिय पार्टी बनाउन सबै खाले राजनैतिक उपायहरु अवलम्बन गर्न नेताहरुलाई निर्देशन दिएका छन् ।
मञ्च संघीय पार्टी भएको हुँदा यो सबै खाले विचारहरुलाई समेटेर अघि बढेको भन्दै १०+१ विचार भनेकै संघीय विचार भएको अध्यक्ष लिङदेनले नेताहरुलाई स्पष्ट पारेका छन् ।
मञ्च सहअस्तित्ववादी पार्टी हो भन्दै उनले यो पार्टीको नीति सिद्धान्त भनेकै संघीय ढाँचाको छ । यहाँ सबै जातीहरु, वर्गहरुलाई समावेशी समानुपातिक प्रणालीबाट उनीहरुको हकअधिकार स्थापित गर्दै राज्य निर्माण गर्ने पार्टी भएको हुँदा यहाँ लागेर गल्ती गरेकी भन्ने चिन्तन नगर्न नेताहरुलाई अध्यक्ष लिङदेनले आग्रह गरेका छन् ।
मञ्चले प्रतिनिधिसभा र ७ वटै प्रदेशबाट प्रत्यक्ष र समानुपातिक दुवै प्रणालीको चुनावमा सहभागीता जनाउने प्रष्ट पार्दै आ–आफ्नो क्षेत्रमा सक्रियसँग चुनावमा सहभागी हुन नेताहरुलाई आग्रह गरेका छन् ।
प्रशिक्षणमा सहभागी नेताहरुले सबै प्रकारका सरकारमा पार्टीलाई स्थापित गर्न प्रदेशलाई कार्यकारी अधिकार दिने खालको राज्य व्यवस्था बारे जोड दिने, सुरक्षा निकायमा भइरहेको चरम लापरवाही, स्थानीय सरकारमा भइरहेको दुरूपयोग, नागरिकको सुशासनमा सबैको उपस्थिति हुने प्रकारको विचारलाई समेत समेट्न अध्यक्ष लिङ्देनलाई अनुरोध गरेका छन् ।
प्रशिक्षण कार्यक्रममा मञ्चका उपाध्यक्ष एबी पन्धाकको पनि उपस्थिति रहेको थियो । काठमाडौंमा रहेका संघीय, प्रदेश र प्रान्तीय नेताहरुको सहभागिता रहेको उक्त कार्यक्रम प्रदेश नं. ३ का सहसंयोजक निशा तुम्बापोको अध्यक्षतामा भएको थियो भने कार्यक्रमको संचालन सचिव सरस्वता लिङदेनले गरेकी थिइन् ।
