चैत २७, इलाम । आगामी बैशाक १५ गते इलाम २ मा हुने उपनिर्वाचनका लागि पहिचान पक्षधरका साझा स्वतन्त्र उम्मेदवार डकेन्द्र सिंह थेगिमले चुनाब चिन्ह ‘हातले बुनेको मुढा’ प्राप्त गरेका छन ।
निर्वाचन आयोगको कार्यतालिका अनुसार आज उम्मेदवारको अन्तिम नामावली प्रकाशन र चुनाव चिह्न वितरण गरिएको निर्वाचन कार्यालय इलामका प्रमुख केशवप्रसाद घिमिरेले बताए ।
कार्यतालिका अनुसार चैत २८ देखि वैशाख १२ सम्म प्रचारप्रसारका लागि समय तोकिएको छ भने वैशाख १५ बिहान सातदेखि साँझ पाँच बजेसम्म मतदानको लागि समय तोकिएको छ ।
स्वतन्त्र उम्मेदवार डकेन्द्र सिंह थेगिमले चुनाब चिन्ह ‘हातले बुनेको मुढा’
उपनिर्वाचनका लागि २० उम्मेदवारले मनोनयन दर्ता गराएका छन् । बाह्र दल र आठ स्वतन्त्र उम्मेदवारले उम्मेदवारी मनोनयन दर्ता गराएको आयोगले जनाएको छ ।
नेकपा एमाले उपाध्यक्ष सुवासचन्द्र नेम्वाङको गत भदौ २६ मा निधन भएपछि रिक्त भएको उक्त क्षेत्रमा उपनिर्वाचन हुन लागेको हो ।
प्रदेश १ पुनः नामाङकरण संयुक्त संघर्ष समितिका ४१ वटा घटकहरुको समर्थनमा चुनावी मैदानमा उत्रेका स्वतन्त्र उम्मेदवार डकेन्द्र सिंह थेगिमलाई ४ वटा भन्दा बढी राजनीतिक दलहरुको समेत समर्थन रहेको छ ।
