भदौ २, काठमाडौं । द भ्वाइस किड्स सिजन ३ को उपाधि अनुया तामाङले जितेकी छन् ।
शनिबार सम्पन्न ग्राण्ड फिनालेमा कोच प्रमोद खरेलका टिमबाट फाइनलिष्ट बनेकी तामाङले द भ्वाइस किड्स सिजन ३ को उपाधि जितेकी हुन् ।
उपाधि जितेसँगै अनुयाले द भ्वाइस किड्स सिजन ३ को ट्रफीको साथमा १० लाख रुपैयाँ र प्रायोजकको तर्फबाट गिफ्ट ह्याम्पर प्राप्त गरेकी छन् ।
यसैगरी अन्य फाइनलिस्टलाई पनि गिफ्ट ह्याम्पर प्रदान गरिएको छ । विजेतालाई हिमालय टिभीका अध्यक्ष धर्मराज भुसाल, कार्यकारी निर्देशक श्याम कँडेल लगायतले पुरस्कार प्रदान गरेका थिए ।
कोच प्रमोद खरेलको टिमबाट अनुया र लाक्पा शेर्पा, कोच मिलन नेवारको टिमबाट समीक्षा दहाल र रिञ्जिन डोल्मा लामा फाइनलिस्ट थिए । यस्तै कोच छेवाङ लामाको टिमबाट द्वितिका प्रधान र छेसाङ तामाङ, कोच मेलिना राईको टिमबाट सिमला धिताल र आयुष लामाले फिनालेमा प्रतिस्पर्धा गरे ।
