इलाम । फास्ट ट्र्याक नामले परिचित इलाम–झापा जोड्ने (केचना–कञ्चनजंघा मार्ग)को पुवाखोलामा निर्मित बेलीब्रिजको बुधबार औपचारिक उद्घाटन भएको छ ।
संघीय सरकारका भौतिक पूर्वाधार तथा यातायातमन्त्री देवेन्द्र दाहाल र भारतीय राजदूत नवीन श्रीवास्तवले बेलीब्रिज संयुक्त रूपमा उद्घाटन गरेका हुन ।
भारतीय सरकारको सहयोगमा एक करोड ३५ लाखको लागतमा गत असारमा उक्त पुल जडान गरिएको हो । सडक डिभिजन कार्यालयका इञ्जिनियर अर्जुन घिमिरेका अनुसार यो पुल ४८ दशमलव छ मिटर लामो छ ।
बेलिब्रिजले इलाम नगरपालिका वडा नम्बर ९ र ११ समेत जोड्ने काम गरेको छ । पुल २५ टन क्षमताको रहेको डिभिजन सडक कार्यालयले जनाएको छ ।
भारतीय सरकारको सहयोगमा एक करोड ३५ लाख रुपैयाँ लगानीमा बेली ब्रिज जडान गरिएको जनाइएको छ ।
पुल सञ्चालनमा आएसँगै पहाड र तराईको दुरी समेत छोटो भएको छ । बेलीब्रिजले ताप्लेजुङ, पाँचथर र इलामका बासिन्दालाई झापा सम्मको आवतजावत सहज भएको छ ।
