काठमाडौं । पहिलो एकदिवसीय अन्तराष्ट्रिय क्रिकेटमा नेपाली राष्ट्रिय क्रिकेट टिमले पपुवा न्युगिनी (पीएनजी) लाई पराजित गर्दै जीत निकालेको छ ।
मंगलबार ओमानस्थित अल अमिरात क्रिकेट मैदानमा भएको खेलमा नेपालले पीएनजीलाई २ विकेटले पराजित गर्दै जीत निकालेको हो ।
पीएनजीले दिएको १ सय ३५ रनको सामान्य लक्ष्य नेपालले ३९ ओभर ३ बलमा ८ विकेट गुमाएर पूरा गर्यो ।
हारतर्फ अग्रसर नेपाललाई रोहित कुमार पौडेल र सोमपाल कामीले उत्कृष्ट ब्याटिङ गर्दै जित दिलाए ।
उत्कृष्ट सुरुवात गरेको नेपालले ४६ रन जोड्दा नेपालले पहिलो विकेटको रुपमा ओपनर कुशल भुर्तेललाई गुमाएको थियो ।
नेपालका लागि कुशलले १५ रन जोड्दा, डेब्यु खेलाडी आसिफ शेखले ३० रन र टिकेर खेलेका रोहित कुमार पौड्यलले ४१ रनको योगदान दिदै नेपालको जितको आधार तय गरेका थिए ।
सोमपाल कामीले अविजित २२ रन जोड्दा यस्तै आरिफ शेखले ९ रन, कप्तान ज्ञानेन्द्र मल्लले ६ रन बनाएर पेभेलियन फर्किए ।
शरद भेषवाकर पनि ६ रनमा आउट हुँदा कुशल मल्ल १ र पवन सर्राफ सुन्य रनमा आउट भए । बिक्रम सोब सुन्य रनमा अविजित रहे ।
पीएनजीका गौडी टोकाले ३ तथा चाड सोपेर र डामिन राभुले २÷२ विकेट लिए ।
यस अघि टस जितेर पहिले ब्याटिङ गरेको पीएनजीले ३३ ओभरमा अलआउट हुँदै १ सय ३४ रन बनाएको थियो ।
पीएनजीका लिगा सिआकाले सर्वाधिक ३० रन बनाउदा चार्लेस अमिनीले २३ रन, र गौडी टोकाले २२ रन बनाए ।
किप्लिन डोरिगा १५ रनमा आउट हुँदा सेसे बाउ १४ रन र कप्तान असाद भाला ४ रन जोडे । यस्तै टोनी उरा र नोसिना पोकाना १÷१ रन तथा जासन किला र डामिन राभु सुन्य रनमा पेभेलियन फर्किए । चाड सोपेर १७ रनमा अविजित रहे ।
नेपालका लागि सन्दीप लामिछानेले सर्वाधिक ४ विकेट लिए । उनले १० ओभरमा ३५ रन खर्चिएर ४ विकेट लिएका हुन् ।
डेब्यु खेलाडी बिक्रम सोबले २ विकेट लिए । बिक्रम डेब्यु खेलको पहिलो बलमै विकेट लिने पहिलो नेपाली खेलाडी बनेका छन् । यस्तै कुशल मल्लले २ तथा सोमपाल कामीले एक विकेट लिए ।
यस जितसँगै दुई खेलको सिरिजमा नेपालले १–० को अग्रता बनाएको छ । नेपाल र पीएनजीबीचको दोस्रो खेल शुक्रबार हुनेछ ।